रामेछाप तामाङ समाज काठमाडौंले रामेछाप जिल्लाबाट एसएलसी परीक्षा २०६७ मा उत्कृष्ट तामाङ विद्यार्थीहरूलाई सम्मानित गरेको छ । कात्तिक २६ गते काठमाडौंमा आयोजित सम्मान कार्यक्रममा जिल्लाका सामुदायिक विद्यालय र देशभरका नीजि विद्यालयबाट उत्कृष्ट पाँच/पाँच जनालाई नगद पुरस्कारसहित सम्मानित गरिएको हो । जिल्लाको सामुदायिक विद्यालयतर्फउत्कृष्ट आङछिरिङ घिसिङले नगद पाँच हजार सहित प्रमाणपत्र प्राप्त गरे । उनले श्री ज्योति माध्यमिक विद्यालय, गाल्पाबाट ७६.२५ प्रतिशत अङ्क ल्याई एसएलसी उत्तीर्ण गरेका थिए । सामुदायिक विद्यालयतर्फउत्कृष्ट पाँचमा पर्न सफल मिनाकुमारी घिसिङ, धर्मेन्द्र मोक्तान, विर्शना दोङ र धिरज लामालाई क्रमशः चार हजार, तीन हजार, दुई हजार र एक हजार नगद सहित प्रमाणपत्र प्रदान गरिएको थियो । त्यस्तै नीजि विद्यालयबाट उत्कृष्ट बन्न सफल लक्ष्मी तामाङले पनि नगद पाँच हजार सहित प्रमाणपत्र प्राप्त गरिन् । अरूणीमा उच्च मावि बौद्धबाट ९०.२५ अङ्क ल्याउन सफल उनी देशभरका तामाङ विद्यार्थीहरूमध्येबाटै छात्रातर्फउत्कृष्ट बनेकी छन् । नीजि विद्यालयबाट उत्कृष्ट पाँचमा परेका राकेश घिसिङ, विशन घिसिङ, शिसाङ ख्युङ्बा तामाङ र सरिता योञ्जनलाई पनि नगद पुरस्कारसहित प्रमाणपत्र प्रदान गरियो । यस वर्षो 'टिचर आफ दि इयर' र 'स्कुल अफ दि इयर'बाट क्रमशः श्री बाल उच्च मावि, खनियापानीका शिक्षक मुक्तिनाथ श्रेष्ठ र श्री ज्योति माध्यमिक विद्यालय, गाल्पा सम्मानित भएका छन् । दुबै विधातर्फसम्मानितलाई नगद पाँच/पाँच हजार प्रदान गरिएको थियो । कार्यक्रमका प्रमुख अतिथि पूर्व कानुन तथा न्याय मन्त्री भिमबहादुर तामाङले पुरस्कार तथा प्रमाणपत्र प्रदान गरेका थिए ।

कार्यक्रममा तामाङ समुदायमा विभिन्न क्षेत्रबाट योगदान पुर्या"एका व्यक्तिहरूलाई 'टप सोसियल फिगर अनर' बाट सम्मानित गरियो । सम्मानित हुनेहरूमा वित्त व्यवसायी सि.वी. लामा, नेपाल तामाङ घेदुङका अध्यक्ष कुमार योञ्जन र शक्ति समूहकी चरीमाया तामाङ रहेका छन् । त्यसैगरी 'र्राईजिङ स्टार अनर' बाट इलामकी सुनिता तामाङ, कलाकार आशुसेन लामा र पत्रकार सुर्य मोक्तान सम्मानित भएका छन् । सम्मानित सुनिता तामाङ २०६७ सालमा प्रमाणपत्र तहमा शिक्षा सङ्कायबाट नेपालभरबाट सर्वोत्कृष्ट छात्राको रूपमा छनोट भई नेपाल सरकारबाट 'नेपाल छात्रा विद्याभूषण' प्राप्त गरेकी थिइन् ।